لو نختلف أو نتفق

رضا احمد

لو نختلف أو نتفق..لو كان خيارك نفترق
مابكرهك
لأنو مابطفي البعاد نيران هوانا وقت تبق

لاعمره حايقدر فراق..افسد قضاياك ياعشق
مابكرهك
لو انت خليتني وبقيت ما بسوي ريدك واستحق
لو بعدك أضناني السهاد والشوق حرق جواي حرق
ما بكرهك
لو صبحت الأحلام رماد..والمرة صبحت لي زاد
وأصبحت لاجئ بلا بلاد لو قطع الشوق الفؤاد
لو فيني شمت الخلق.
مابكرهك
لو غير النيل سكتو.لو ليلى يوم قيس خلتو
لو الفراش هجر الزهور الحبتو
لو السماء فوق الأرض يجي منطبق
ما بكرهك
بعيش عليه عشم المطر...لو جاي من جيهتك برق
كيف أكرهك
ما كان قبيل حبك ترف.لاكان هواي دوران ولف
لا قلبي على غيرك عطف
عشان يوم تفوت حبك يموت
صوتك يكون ماعنده صوت.ما ألقى ليك حبة أسف
مابكرهك
مهما قسيت وقفلت باب الريد كف
لا دمعه سالت...لا آآآه.....لا شريااان نزف
انا لسه بشتاق ليك احن .اتعاطى ذكراك بشغف
عشان تدخل انت من اي فج
فتحت باب الشوق ضلف..عشان تدخل انت من أي فج
رغم اني عارفاك ما بتجي لا بالمواعيد لا الصدف
مابكرهك
رغم الأسى وحبل الوصال الإتنتف
كيف يكره العرف الهوى.والعايش الريد بشرف
مابكرهك
رغم الأسى وجرحي الأليم.من الله ماخلق السماء
أرسى الجبال....طرح الأديم
إخلاصنا لأول حبيب..وحنينا للحب القديم مهما يكون
قلب البحب دايما حليم
مابكرهك..
عندك جواز ممكن..تطل جواي اوتصبح مقيم
لو قلبك اختار لسواي.. بفخر إني امي من الحريم
ما بكرهك
كيف أكرهك..وأنا برسمك أسطورة للزول الوسيم
وأتنسمك في الكتمه زي ألطف نسيم
واتبسمك في بسمه طالعه من الصميم
وأتلمسك هدى للخطى نحو الصراط المستقيم
أتحسسك تسكني مرات وبسكنك
جواي..أدسك وأسكنك..أجي تاني واقو ليك بكرهك
استغفر الله العظيم
أنا بعشقك....أنا بعشقك.....أنا بعشقك
انا بعشقك يازين وياسمح الخصال
انا بعشقك قدرالقلوب الشارفه للقاء والوصال
أنا بعشقك قدر العيون ما صوبت في الدنيا للعاشقين نيبال
أنا بعشقك قدرالوفاء بين زوله جدعه وزول وفي وجد ود حلال
وأنا بعشقك قدر الخلوق ما ترقبت في كل عام جية الهلال
أنا بعشقك قدر الأنين ..قدر الحنين..وكتين حبيبنا بعاده طال
أنا بعشقك قدر النواح..قدر الجراح..قدر الصبر والاحتمال
أنا بعشقك قدر السماح..قدر الكفاح..قدر البراح..في كل مجال
وانا بعشقك قدر الصلاح..قدر الفلاح...قدر الضلال
انا بعشقك قدر الهواجيس والظنون قدر الاباليس والجنون
وأنا بعشقك قدر الحروف في كل مقال
وأنا بعشقك قدر الحجيج لمكه ماشدة الرحال
مابكرهك
وكيف أكرهك..ووحي القصائد
من خلال ظلم الحبايب.ومن خلال قدر الحبايب
ومن خلال كيد البنات...واحيانآ كثير غدر الرجال
مابكرهك وأنا داير اسال سؤال
هل بيكره القلب اللي بيحب
ده سؤال للي قال انا بكرهك