ﻣﺤﻤﻮﺩ ﺍﻟﺸﻘﻰ ﺍﻟﻌﻮﺍﺍﺍﺍﺍﻡ

ﻣﺤﻤﻮﺩ ﺍﻟﺸﻘﻰ ﺍﻟﻌﻮﺍﺍﺍﺍﺍﻡ
==============
ﺗﺘﺬﻛﺮ ﺍﻟﻴﻮﻡ ﺍﻟﻤﺮﻗﺖ ﻭﺭﺍﻙ
ﻭ ﺇﻧﺖ ﻋﻠﻲ ﺳﻔﺮ؟؟
ﻛﺖ ﺩﺍﻳﺮﻩ ﺃﻗﻮﻟﻚ ﻛﻠﻤﺘﻴﻦ
ﻗﺒﺎﻝ ﺗﻔﻮﺕ ﺷﺎﻗﻘﺖ ﺑﻴﻨﺎﺕ ﺍﻟﺒﻴﻮﺕ
ﺷﺎﻥ ﺃﻟﺤﻘﻚ
ﻻﻗﺎﻧﻲ ﻋﻢ ﻋﺒﺪﺍﻟﻠﻪ
ﻭﺍﻗﻒ ﻓﻲ ﺿﺮﺍ ﺍﻟﺪﻛﺎﻥ
ﻭﻛﺎﻥ ﺇﺣﺴﺎﺳﻲ ﺑﻴﻚ ﺃﻛﺒﺮ ﻣﻦ ﺍﻣﺸﻴﻠﻮ
ﻭﺃﻗﻮﻟﻮ ﺳﻼﻡ
ﻭﺑﺮﺿﻲ ﻣﺸﻴﺘﻠﻮ ﺷﺎﻥ ﺍﻟﻨﺎﺱ
ﺃﺳﻜّﺖ ﻟﻲ ﻟﺴﺎﻥ ﺇﺣﺴﺎﺳﻢ ﺍﻟﻜﻼﻡ
ﻭﻋﻢ ﻋﺒﺪﺍﻟﻠﻪ ﻛﻴﻒ ﺣﺎﻟﻚ
ﺑﺮﺍﻙ ﺍﻟﻠﻴﻠﻪ ﻣﺎﻟﻚ ﻓﻲ ﺿﺮﺍ ﺍﻟﺪﻛﺎﻥ؟؟
ﻣﺎ ﺭﺍﺟﻴﺎﻫﻮ ﻛﻨﺖ ﻳﺮﺩ
ﻗﻌﺪ ﻳﺤﻜﻴﻠﻲ ﻋﻦ ﻣﺤﻤﻮﺩ
ﻭﻟﺪ ﺑﺖ ﺑﺘﻮ
ﻓﻲ ﻣﺮﺳﺎﻝ ﻭﻣﺎ ﻣﺮﺳﺎﻝ
ﻭﺧﺎﻳﻔﻮ ﻋﻠﻲ ﺍﻟﺒﺤﺮ ﻳﻨﺰﻝ
ﻗﺎﻟﻲ ﺍﻧﺎ ﻗﻠﺘﻠﻮ ﻭﺣﺬﺭﺗﻮ
ﻟﻜﻦ ﺑﺮﺿﻲ ﻋﺎﺭﻑ ﺭﺍﺳﻮ ﻣﻦ ﻣﺎ ﻗﺎﻡ
ﻣﺘﻞ ﺣﺒﻮﺑﺘﻮ ﺑﺖ ﺍﻟﺨﻴﺮ
ﻭﻻ ﺑﻴﻔﻜﺮ ﻫﻮ ﻟﻠﻬﺪّﺍﻡ
ﻭﺍﻧﺎ ﺍﻟﻤﺸﺪﻭﻫﻪ ﻓﻲ ﺩﺭﺑﻚ
ﺑﻘﻴﺖ ﻻ ﻋﺎﺭﻓﻪ ﺍﺧﻠﻲ ﻭﺍﻓﻮﺕ
ﻭﻻ ﺩﺍﻳﺮﺍﻙ ﻛﻤﺎﻥ ﺗﺮﺣﻞ
ﺗﺘﻢ ﺍﻟﻌﺎﻡ
ﻭﺍﺷﻴﻞ ﻭﺍﻟﻘﺎﻟﻮ ﻓﻲ ﺍﻷﻋﺬﺍﺭ
ﺃﺑﻮﻱ ﻋﺒﺪﺍﻟﻠﻪ ﻻ ﺗﺸﻔﻖ
ﺩﻩ ﻣﺤﻤﻮﺩ ﺍﻟﺸﻘﻲ ﺍﻟﻌﻮﺍﻡ
ﻭﻻ ﺗﻬﺘﻢ ﻗﺒﻞ ﻳﻮﻣﻴﻦ ﺃﻧﺎ ﻭﻣﻴﻤﻮﻧﻪ ﺷﻔﻨﺎﻫﻮ
ﻭﻣﻌﺎﻫﻮ ﻭﻻﺩ ﻛﺘﺎﺭ ﻓﻲ ﺍﻟﻘﻴﻒ
ﻭ ﻗﻠﺘﻼ ﺷﻔﺘﻲ ﻗﻮﺓ ﺭﺍﺳﻮ؟؟
ﺃﻣﻮ ﻣﻦ ﺍﻟﺼﺒﺎﺡ ﺳﺎﻣﻌﺎﻫﺎ
ﺗﻨﻬﺮ ﻓﻮﻗﻮ ﻻ ﺗﺘﺪﻟﻰ ﻳﺎ ﻣﺤﻤﻮﺩ
ﻭﺃﻭﻋﻚ ﺗﺒﺮﻯ ﻭﺩ ﺣﻤﺪﻳﻦ
ﻣﺴﻠﻂ ﻭﺯﺍﺗﻮ ﻣﻮ ﻗﺪﺭﻙ
ﻭﻳﻲ ﺩﺍ ﺍﻟﺸﺎﻳﻔﺎ ﻗﺪﺍﻣﻚ
ﻫﻮ ﺃﻭﻝ ﺯﻭﻝ ﻗﺼﺎﺩ ﺍﻟﻘﻴﻒ
ﻭﻗﺎﻟﺖ ﻟﻲ ﻻ ﺗﻨﺎﺩﻳﻬﻮ ﻳﺎ ﺍﻟﺰﻳﻨﻪ
ﺍﻟﻮﻟﺪ ﻭﺍﻗﻒ ﻳﻌﻠﻢ ﻓﻲ ﺍﻟﺒﻄﺎﻥ ﺍﻟﻌﻮﻡ
ﻭﺧﻠﻴﻬﻮ ﺍﻟﺠﻨﻲ ﻫﺴﻊ ﻳﻜﻮﺭﻙ
ﻭﺍﻟﻘﻴﺎﻣﻲ ﺗﻘﻮﻡ
ﻭﻗﻠﺘﻠﻮ ﺗﺎﻧﻲ ﻻ ﺗﺸﻔﻖ
ﺑﺮﺍﻙ ﺷﺎﻳﻒ ﺍﻟﺒﻠﺪ ﺑﻲ ﺧﻴﺮﺍ
ﻟﺴﻪ ﻏﺮﺍﺑﺎ ﻣﺎ ﺣﻠّﻖ
ﻫﺪﺍﻙ ﺯﺍﺗﻮ ﺍﻟﻨﺨﻞ ﻓﺮﺣﺎﻥ
ﺧﺮﻳﻔﻮ ﺍﻟﺤﻮﻝ ﺩﻩ ﻣﺎ ﺑﺮّﻕ
ﺗﻤﺮﻧﺎ ﺍﻳّﺎﻫﻮ ﺯﻱ ﻣﺎ ﻛﺎﻥ
ﻭﻻ ﺷﻔﻨﺎ ﺍﻟﻤﻄﺮ ﻧﻘﻨﻖ
ﺗﺸﻮﻑ ﺍﻟﻌﺎﻓﻴﻪ ﻳﺎ ﻳﺎﺑﺎ
ﻭﻣﻌﺎﻙ ﺳﻼﻡ
ﻭﺑﻤﺸﻲ ﻭﺍﺟﻴﻚ
ﻭﻛﺎﻥ ﻻﻗﻴﺖ ﻫﻨﺎﻙ ﻣﺤﻤﻮﺩ ﺑﺮﺳﻠﻮ ﻟﻴﻚ
ﻭﻓﺖ ﻣﻜﺎﻧﻮ ﺑﻲ ﺷﺎﺭﻋﻴﻦ
ﺃﻗﻮﻝ ﻳﺎﺍﺍﺍﺍﺍﻟﻠﻪ ﻟﺴﻪ ﺍﻟﺒﺺ ﻳﻜﻮﻥ ﻭﺍﻗﻒ
ﺭﺑﻄﺖ ﻫﻮﺍﻙ ﻓﻲ ﻃﺮﻓﻲ
ﻭ ﻗﻠﻴﺒﻲ ﻳﺪﻕ
ﻋﻠﻲ ﻧﻐﻢ ﺍﻟﺨﻄﺎ ﺍﻟﺠﺎﺭﻳﺎﺕ
ﻳﻜﻮﻥ ﻋﺎﺭﻑ ﺣﺘﺮﺟﺎﻫﻮ
ﻭﺣﻴﺮﺟﻊ ﺧﺎﻃﺮﻭ ﺑﻴﻚ ﻣﺠﺒﻮﺭ
ﻭﻻﻗﻴﺘﻚ ﺩﻭﺍﺧﻠﻲ ﻋﻠﻴﻚ ﺗﺘﺸﺎﺑﺎ
ﻭﺃﺣﺲ ﺑﺎﻟﺪﻧﻴﺎ ﻓﻴﻚ ﺑﺘﺪﻭﺭ
ﻭﺻﻮﺗﻚ ﻓﻲ ﺍﻟﻜﻼﻡ ﻳﺒﻘﺎﻟﻲ
ﺩﺍﻳﺮ ﺑﺲ ﻧﻐﻢ ﻃﻤﺒﻮﺭ
ﻭﻗﻤﺖ ﺍﺩﻳﺘﻚ ﺍﻟﺤﺠﺒﺎﺕ
ﻭﺇﻧﺖ ﺗﻘﻮﻟﻲ ﻳﺎﻟﺰﻳﻨﻪ ﺍﻟﺤﻔﻴﻆ ﺍﻟﻠﻪ
ﻭﺷﻦ ﺣﻴﺴﻮﻥ ﺍﻟﺤﺠﺒﺎﺕ
ﻛﺎﻥ ﺳﻴﻒ ﺍﻟﻘﺪﺭ ﺣﻞّ
ﻛﻔﺎﻳﻪ ﻋﻠﻲ ﺃﺷﻴﻞ ﺫﻛﺮﺍﻙ
ﻭﺃﻟﻒ ﺣﺠﺎﺏ ﻫﻮ ﻣﺎ ﺑﻴﺒﻘﺎﻟﻲ
ﺯﻱ ﺷﻮﻓﺘﻚ ﻭﻻ ﺭﻳﻖ ﺷﻮﻗﻲ ﺑﺘﺒﻼ
ﻭﺭﺟﻌﺖ ﻣﻌﺎﻱ ﻋﻘﺎﺏ
ﺇﺣﺴﺎﺳﻲ ﺑﻲ ﻟﻘﻴﺎﻙ
ﻫﻨﺎﻙ ﺗﺎﻭﻗﺖ ﻟﻠﺤﻠﻪ
ﻭﺟﺮﻳﺖ ﺍﻟﺤﻖ ﺷﻨﻮ ﺍﻟﺤﺎﺻﻞ
ﻭﻟﻲ ﻛﻞ ﺍﻟﺨﻠﻖ ﻭﺍﻗﻔﻴﻦ؟؟
ﻭﺻﻮﺕ ﻓﻄﻮﻣﻪ ﺑﺖ ﻳﺎﺳﻴﻦ
ﻋﻠﻲ ﻃﺮﻑ ﺍﻟﺒﻠﺪ ﻭﺍﺻﻞ
ﻭﺍﻗﻮﻝ ﺑﺲ ﻻ ﻳﻜﻮﻥ ﺍﻟﺰﻳﻦ ﺃﺑﻮ ﺍﻟﺘﻮﻣﺎﺕ
ﻫﻮ ﻛﺎﻥ ﻋﻴﺎﻥ ﻭﻋﻨﺪﻭ ﻭﻟﻴﺪ ﺷﻘﻲ ﻭﺟﺎﻫﻞ
ﺗﻘﻞ ﺣﺲ ﺍﻟﺨﻄﺎﻭﻱ ﻋﻠﻲ
ﻣﺮﻗﺖ ﺷﻮﻳﻪ ﻟﻲ ﻗﺪﺍﻡ ﻭﺷﻔﺖ ﺍﻟﺰﻳﻦ
ﺑﻴﺴﺘﻐﻔﺮ
ﻋﺮﻓﺘﻮ ﻳﻜﻮﻥ ﺩﻩ ﺣﺎﺝ ﻋﺜﻤﺎﻥ
ﺇﻣﺎﻡ ﺍﻟﺠﺎﻣﻊ ﺍﻟﻔﺮﺷﻮﻫﻮ ﻣﻦ ﺳﻨﺘﻴﻦ
ﺑﻌﺪ ﺣﺼﻠﺖ ﻋﻢ ﻋﺒﺪﺍﻟﻠﻪ
ﻣﺎﻟﻮ ﺍﻟﻨﺎﺱ ﻣﺤﺎﻭﻃﺎﻫﻮ؟؟
ﻭﺟﺮﻥ ﻋﻴﻨﻲ ﻋﻠﻲ ﺍﻟﻔﻲ ﺍﻟﺪﻧﻴﺎ ﺑﻜّﺎﻫﻮ
ﻭﺻﻐﺎﺭ ﺍﻟﺤﻠﻪ ﻓﻲ ﺿﻞ ﺍﻟﺸﺠﺮ ﻭﺍﻗﻔﻴﻦ
ﻭﻳﺒﻜﻮ ﺑﻼ ﻳﻌﺮﻓﻮ ﺍﻟﻤﻮﺕ
ﻭﻋﺮﻓﻮ ﺍﻟﻠﻴﻠﻪ ﻓﻲ ﻣﺤﻤﻮﺩ
ﻏﺮﻕ ﻣﺎ ﺟﺎﻭﺏ ﺍﻱ ﺳﺆﺍﻝ
ﻣﻨﻮ ﺍﻟﻨﺎﺩﺍﻙ ﻳﺎ ﻣﺤﻤﻮﺩ
ﻣﻨﻮ ﺍﻟﻘﺎﻟﻚ ﻛﻔﺎﻙ ﺗﻌﺎﻝ؟؟
ﺃﺑﻮﻙ ﻋﺒﺪﺍﻟﻠﻪ ﻭﺍﻗﻔﻠﻚ
ﻗﺒﻴﻞ ﻣﺎ ﺭﺳﻠﻚ ﻣﺮﺳﺎﻝ؟؟
ﻭﺃﺻﻠﻮ ﺩﻩ ﻣﺎ ﺑﺤﺮﻧﺎ ﺍﻟﻜﺎﻥ
ﺣﻨﻴّﻦ ﺻﺪﺭﻭ ﻟﻸﻃﻔﺎﻝ
ﺗﻜﻮﻥ ﻋﺎﻓﺮﺗﻮ ﻳﺎ ﻣﺤﻤﻮﺩ
ﺑﻘﻦ ﺇﻳﺪﻳﻚ ﻋﻠﻴﻬﻮ ﺗﻘﺎﻝ
ﺗﻌﺎﻝ ﻭﺭﻳﻨﻲ ﺷﻦ ﻭﺩﺍﻙ
ﻭﻛﻴﻒ ﺍﻟﻨﺎﺱ ﺗﺤﻨﺲ ﻭﺍﻟﺪﺗﻚ ﺗﺼﺒﺮ
ﻫﻲ ﺗﺼﺒﺮ ﻟﻴﻪ؟
ﻭﺗﺼﺒﺮ ﻛﻴﻒ؟
ﻭﻟﻮ ﺃﺻﻠﻮ ﺍﻟﺼﺒﺮ ﻭﺍﺟﺐ
ﻛﺎﻥ ﻳﺼﺒﺮ ﻋﻠﻴﻚ ﺍﻟﻤﻮﺕ
ﻭﻭﻳﻨﻮ ﻋﻨﺎﺩﻙ ﺍﻟﻘﺎﻟﻮﻫﻮ
ﻟﻲ ﺗﺴﺘﺴﻠﻢ ﺍﻧﺖ ﺗﻔﻮﺕ
ﺩﻩ ﻛﺎﻥ ﺣﻘﻚ ﺗﻘﺎﻭﻳﻬﻮ
ﺑﺪﻝ ﺗﻜﺴﻲ ﺍﻟﺒﻮﺍﺩﻱ ﺳﻜﻮﺕ
ﻭﻳﺎﻫﺎ ﺍﻟﺪﻧﻴﺎ ﻣﻦ ﺷﻔﻨﺎﻫﺎ
ﻓﻴﻬﺎ ﻋﺮﻓﻨﺎ ﺩﻕ ﺍﻟﺴﻮﻁ
ﺑﻼ ﻋﺮﺳﺎً ﻳﻠﻢ ﺍﻟﻨﺎﺱ
ﻭﻧﺤﻦ ﻋﻠﻲ ﺟﻬﻠﻨﺎ ﺍﻟﻔﺎﺕ
ﻭﺷﺪﺓ ﻏﻴّﻬﺎ ﺍﻟﻮﺳﻮﺍﺱ
ﻛﻤﺎﻥ ﻧﻘﻠﻊ ﻫﺪﻳﻤﺎﺗﻨﺎ
ﻭﻧﻘﺒﻞ ﻓﻲ ﻭﺷﻲ ﺍﻟﻘﺒﻠﻪ
ﻭﺗﺼﻴﺐ ﻧﻔﺲ ﺍﻟﺠﺮﻳﺢ ﺍﻟﻔﺎﺕ
ﻳﻘﻮﻡ ﻳﻬﺮﺝ ﺗﺰﻏﺮﺩ ﺑﺎﻟﻔﺮﺡ ﻓﻴﻨﺎ
ﻭﻧﺰﻏﺮﺩ ﻧﺤﻦ ﻣﻦ ﻭﺟﻌﺎﺗﻨﺎ
ﺗﺴﺘﻜﺘﺮ ﺗﺨﺖ ﻗﺮﺽ ﺍﻟﺼﺒﺮ ﻓﻮﻗﻮ
ﻭﺑﺮﺍﻫﻮ ﺍﻟﻤﻮﻟﻰ ﻗﺎﺩﺭ ﻳﺸﻔﻲ ﻣﺨﻠﻮﻗﻮ
ﻭﺣﺴﺎﺑﻲ ﻣﻌﺎﻛﻲ ﻳﺎ ﺩﻧﻴﺎﻳﺎ ﺩﺍﺑﻲ ﻛﺸﺤﺖ
ﻣﺎﺭﻭﻗﻮ
ﻭﻳﻜﻮﻥ ﻣﺤﻤﻮﺩ ﺑﺮﺍﻫﻮ ﻋﺮﻑ
ﺷﻨﻮ ﺍﻟﺮﺍﺟﻴﻬﻮ ﻓﻲ ﺍﻷﻳﺎﻡ
ﻭﻗﺎﻝ ﺍﺣﺴﻦ ﻧﻀﻴﻒ ﻭﺧﻔﻴﻒ ﺍﺧﻠﻴﻬﺎ
ﻭﻭﺭﺍﻱ ﺍﻧﺸﺎﺍﻟﻠﻪ ﻣﺎ ﺗﻌﻤﺮ ﺑﻮﺍﺩﻳﻬﺎ
ﻭﺭﺣﻞ ﻟﻠﻴﻠﻲ ﻛﺎﻳﺴﻨﻮ
ﺍﻟﺒﻴﻮﺕ ﻛﻴﻔﻦ ﻧﻀﻮﻳﻬﺎ
ﻭﺑﺮﺿﻚ ﺗﺴﺄﻝ ﺁ ﺍﻟﻤﺮﻳﻮﺩ
ﻫﻲ ﻣﺎﻻ ﺑﻠﺪﻧﺎ ﺷﻦ ﻓﻴﻬﺎ؟؟
ﺩﺣﻴﻦ ﺧﻠﻴﻨﻲ ﻫﺴﻊ ﻗﻮﻡ
ﻋﻠﻲ ﻋﺒﺪﺍﻟﻠﻪ ﻭﺃﻡ ﻣﺤﻤﻮﺩ ﺗﻌﺰﻳﻬﺎ
ﻭﺑﺠﻴﻚ ﻋﻨﺪ ﺍﻟﻌﺼﻴﺮ ﻣﻨﺴﺮﻗﻪ
ﺷﺎﻥ ﺍﻟﻨﺎﺱ ﻭﻧﺎﺭ ﺍﻟﺸﻮﻕ ﺃﻃﻔﻴﻬﺎ
ﻭﻭﺭﺍﻙ ﺍﻧﺎ ﻣﺎ ﻟﻘﻴﺘﻠﻲ ﻓﺮﺡ
ﻭﺣﺎﺗﻚ ﻋﻴﻨﻲ ﻳﻌﻤﻴﻬﺎ
ﻭﻣﻌﺎﻙ ﺳﻼﺍﺍﺍﺍﺍﺍﺍﻡ

ﻭﻛﻴﻒ ﺍﻟﻨﺎﺱ ﺗﺤﻨﺲ ﻭﺍﻟﺪﺗﻚ ﺗﺼﺒﺮ
ﻫﻲ ﺗﺼﺒﺮ ﻟﻴﻪ؟
ﻭﺗﺼﺒﺮ ﻛﻴﻒ؟
ﻭﻟﻮ ﺃﺻﻠﻮ ﺍﻟﺼﺒﺮ ﻭﺍﺟﺐ
ﻛﺎﻥ ﻳﺼﺒﺮ ﻋﻠﻴﻚ ﺍﻟﻤﻮﺕ
ﻭﻭﻳﻨﻮ ﻋﻨﺎﺩﻙ ﺍﻟﻘﺎﻟﻮﻫﻮ
ﻟﻲ ﺗﺴﺘﺴﻠﻢ ﺍﻧﺖ ﺗﻔﻮﺕ
ﺩﻩ ﻛﺎﻥ ﺣﻘﻚ ﺗﻘﺎﻭﻳﻬﻮ
ﺑﺪﻝ ﺗﻜﺴﻲ ﺍﻟﺒﻮﺍﺩﻱ ﺳﻜﻮﺕ
ﻭﻳﺎﻫﺎ ﺍﻟﺪﻧﻴﺎ ﻣﻦ ﺷﻔﻨﺎﻫﺎ
ﻓﻴﻬﺎ ﻋﺮﻓﻨﺎ ﺩﻕ ﺍﻟﺴﻮﻁ
ﺑﻼ ﻋﺮﺳﺎً ﻳﻠﻢ ﺍﻟﻨﺎﺱ
ﻭﻧﺤﻦ ﻋﻠﻲ ﺟﻬﻠﻨﺎ ﺍﻟﻔﺎﺕ
ﻭﺷﺪﺓ ﻏﻴّﻬﺎ ﺍﻟﻮﺳﻮﺍﺱ
ﻛﻤﺎﻥ ﻧﻘﻠﻊ ﻫﺪﻳﻤﺎﺗﻨﺎ
ﻭﻧﻘﺒﻞ ﻓﻲ ﻭﺷﻲ ﺍﻟﻘﺒﻠﻪ
ﻭﺗﺼﻴﺐ ﻧﻔﺲ ﺍﻟﺠﺮﻳﺢ ﺍﻟﻔﺎﺕ
ﻳﻘﻮﻡ ﻳﻬﺮﺝ ﺗﺰﻏﺮﺩ ﺑﺎﻟﻔﺮﺡ ﻓﻴﻨﺎ
ﻭﻧﺰﻏﺮﺩ ﻧﺤﻦ ﻣﻦ ﻭﺟﻌﺎﺗﻨﺎ
ﺗﺴﺘﻜﺘﺮ ﺗﺨﺖ ﻗﺮﺽ ﺍﻟﺼﺒﺮ ﻓﻮﻗﻮ
ﻭﺑﺮﺍﻫﻮ ﺍﻟﻤﻮﻟﻰ ﻗﺎﺩﺭ ﻳﺸﻔﻲ ﻣﺨﻠﻮﻗﻮ
ﻭﺣﺴﺎﺑﻲ ﻣﻌﺎﻛﻲ ﻳﺎ ﺩﻧﻴﺎﻳﺎ ﺩﺍﺑﻲ ﻛﺸﺤﺖ
ﻣﺎﺭﻭﻗﻮ

كلا م في الصميم