منتديات أنوار المدينة
أهلاً وسهلااً بك زائرنا الكريم إذا كانت هذه زيارتك الأولى نرجو من حضرتك التسجيل
حتى تتمكن من استعمال العناوين الخارجية

اجمل قصايد الصباح سودانيه

استعرض الموضوع السابق استعرض الموضوع التالي اذهب الى الأسفل

اجمل قصايد الصباح سودانيه

مُساهمة من طرف شريف ابراهيم في الثلاثاء 24 مارس 2015 - 6:19

[size=48]صباح الخير يازول ياسمح

[/size]
( إهدا خاص جداً لأروع انثى زينت مدائن زاكرتي ثم مضت.......)

ياصباحا اتمدد على مراسي السؤال عنك
وقتين تتسابق خطى الاشواق
وتمد الورود كف الرحيق
يسالم جيد بسمتك
الصباح
مفتون بطلعتك
يجيك الندى يقيف قصادك
ردد صوت الصدى
في صمت
معاي
صباح الخير يا زول ياسمح
مرق الفؤاد من جواي
مخلوع يفتش على خيوط الصباح
وقتين غابت الشمس
قال الحنين الشايلو ليك
من زمن
للفؤاد المقتول بالشجن
لاقاني الضلام
مزهول ومخلوع يردد:
ضافيرك غطت عين الشمس !
وانا ماشفت الصباح من امس!
منتظرك بفارق الصبر
معاي
الدنيا تترجاك
لميها عليك ضفايرك
ولو برسالة منك
شأن تطلع على الناس
وعلي الشمس !
وبلهفة حنيني ليك
تصدح العصافير
ويدفق ندى الاحلام بين ايديك
تسجد الازهار قدامك
تمد بطاقة مني ليك:
صباح الخير يازول ياسمح
يهمس الشوق في اذن الحلم:
طال سكوت الشمس
وسافر شعاع الامل يفتش عليك
شأن يأذنك:
مستنيك الشروق على شرفة مراسيك
كتن تغسل خصلك وجع القلب
الا ليل شعرك دس الشمس في ضفايرك
وناسيها من امس!
تتوسلك شفع المدارس
غناوي النوارس
سيوف الفوارس
الواقفة على شاطئ دجلة
تتوسلك:
لميها عليك ضفايرك
يجيك الفرات شايل بريد الشوق
وفي ايدو جواب
مكتوب بدم السحاب
من كمين حرف
وباقة ورد:
صباح الخير يا زول يا سمح
صحى الحنين على نشيد شوق الشوق الصادح
في جروف الهوى الممتدة في مدائن فؤادك
بعد ركعتين ودعاء
هجعة وطولة بال
تتنزل السكينة على مراسيك
يغشاك المطر
ريحة الطين تفرد دعاش ضفايرك
سجادة وصول
وتسابق خطاك خطى الحنين
لزولا متخبئ في جواك
ومستنيك زمن طول
ساكنك سواك وطن
وفاتح كتاب الدين
يرتل سورة الرحمن
ويقراك وقتين ينوم ويصحى
بي طلتك
ركعتين ويس
دقة نوبة ومدحة صباحية
ونفحات الصوفية تردد معاي:
صباح الخير يازول ياسمح
ياخايفة من احساس صبح في جواك حقيقة
ومن حنين سد افق الاسئلة
الاجابةفي شجن وجدك
وصبابة صباك
تترجاك وقتين اسنفر الهوى اسراب الغرام
وواقفة على حافة جرف الصدق
ومنتظرة منك الاشارة
ياراسية راجياه يدلك رب الخلق على منتهاك
الفي جواي
ما خاب الصلى ورفع ايدو للسماء
واتوكل زرع الارض
ما انت موعودة
ذي الارض بكرة ونقية ذي مريم
يا مداين الحنين الطالعة من الحداد
موكب فرح ينثر في القصايد اهازيج ومرح
اتلفحت بي شال شوقي ليك
وبخرت قرمصيص عينيك بالعديلة والزين
واتزينت ببهاك واخدت من جمالك فال
قصيدي وغناك
مرقت الانثى من جواك
في زفة عروس
ماشة تتقدل
على بساط قلبي المفرش
على نار الوجع
وراجيها طلعتك
يحلم بالودادو الالفة
وشايلك في روحي زاد
ادلي اديني الامان
عشان خاطر العصافير التشقشق
في كل مكان
وخجلانة من مهرجان ضحكتك
اتلبدت وقالت معاي:
صباح الخير يازول ياسمح
وقلبي الفات اسر نفسه
عندك
وطاف وجداني في قداس هواك
مكتف بالحنين
مربط بالشوق
وينده قلبي المجنزر بيك
مجنون وحائر فيك
ما كفاك نزيف الغرام
الغطى افق الشك بي يقيني بيك
ما كفاك سهر الايام
من وجع الوجع الرجع ينتح من تاني
وبكى الحمام
وغييب ليل ضفايرك شمس صوتك
وسد اذن الامل بحلم شوفتك
وتقطع سكين لحظك
روح حبي ليك
وتنزف حتى الشهيق
تتسربل بالدم مسافات العشم
وقتين حرمتي علي شوفتك
كان يرضيك غيبي عني
قدر قدرتك
ما اصلو رب العباد ما شقة حنكا ضيعو
وقبال تفارق روح الحنين
فؤادي المسكون بيك
تتوسلك دبابيس شعرك
الحب الصادق والغرام
المكبوت في جواك يتوسلك
مالك تعزبي فيني وتتعزبي
كضب القال انا ما حاسي بيك
ولو كان بكفيك عزبيني حتى الممات
ابدا ما تتوقفي
كنت متحري شوفتك هلال للصائمين
وقتين يموت نفسي من العطش
تفضل روحي تايهة في السماء
وتهاتي بيك:
صباح الخير يا زول ياسمح
جدعييني بحجار البعاد والجفى
غمسيني في السهاد والشقى
ودريني في دنياك
ما يهمك تعبي والاسى
اصلوبيني على ابواب مداينك
زولا ماتاب من غرامك
ما خاف بطش بعادك
وما عدم عشم اللقاء
قطعيني حتة حتة
ما بقول اه حي
وما بترجاك لقاء
ولمن فؤادك يفيق ويحس
بزولا هناك راجيك
ما كلة ما ملة عذابك لحظك
ومنك ما سهي
شيلي الحنين مني زاد
واديني العذاب الوجع السهر السهاد
الارق المرض العضال وكل اشكال الشقى
قدر قدر البشبع غرور انوثتك
حرم مابقول كفى
وردن خيول شوقي
بحر هواك دقش يتسابقن
ورجعن محملات بالعطش منك
تب ماشافت روى
تقسم بطاقات وعدك بشارة خير
على الناس العزاز وعلي
وصاياك تشد وتر الصدق
تعزف على الكمان انغام همسك
وقتين يفوت حد الصبر حبي
امرق في الشوارع وافتش عليك
وانادي في الناس
منو الشاف ست البنات وعزهم
راسية ورزينة احلى من الغروب
واروع من كل مدينة
مأصلة واصدق من كل عينة
نزل المطر يتمشى في سكتك
ويردد معاي قبال جيتك:
صباح الخير ا زول ياسمح
رسمت على جدار صمتك براكين الحنان
تدفق حمم الوله تسيل دموع الامنيات
الخاتة ايدها على خد وعدك راجياها
منك بشارة
شرد الفؤاد واتوهط مداينك
منو الرجع للحنين نضارتو
منو التاكى باب الوجع بيلمسة حنان
راجيك واقف على حفيان
على جمر الترقب
وواثق من جيتك
طرزت بساتين العشق توب وعلى جيدك
ختيت عقد الشوق
ادلي
مانزلت غير دموع هواي
وقتين طالت غيبتك
يا واحة في صحراء الشجن
والزمن الكضب
ياشبورة مطر البخات
الكحل نيل الشوق بي ضفايرك
وقتين ادفقن على اكتاف الحمام
غابت الشمس
وفضل وهج بريق ابتسامتك
نور متاريس العتمة للاطفال
وفتح الدروب الليك تودي
ومايرجعن
ما تتوهيني
ما كفاية انا تايه من زمان
بفتش عليك وانت في ذاتي زاد
وفي غربتي سكة امل
بسألك بالرفع السماء من غير عمد
ياخي خلي بالك على المكتول كمد
ولع نار غرامك في مسيد القلب تقابة
تضوى لدراويش الشوق السكرانين
بنشوى ضحكتك
علي اتلفتي شوفي لبي المقيد
وصابر على سياط وجدك
بتجلد فيهو
وسرحان في تقاسيم مشيتك
ويقراة في عيونك سور الحنين
وايات التعب القصصن جنحيين الامل
حلفتك بمراسيل الشوق
الطاشة في دربك
كان تقفلي مطارات غربتي
وتقفي قطارات الوجع
المسافرة في ذاتي
متين تطلع شمسك علي
وتغطيني من برد الترقب والانتظار
واللهفة وتضمد جراح الاحتمال
صباح الخير يازول ياسمح
متين تشيلي شعرك تختيه وسادة على راسي
بعد ما وسدتك وجداني
وفرشت ليك شريان القلب
وختيت ليك وجدتني مداس
كان يرضيك
وضميتك علي
وعلى وصدر المحافل
علقتك عقد
وزينت بيك ابواب الجنة قنديل
ولبستك خاتم سليمان دبلة
وبلقيس وقتين شافتك
اضارت منك
ولمن مرقت
مرقت لابساك على راسها تاج!!!
وهدهدتك بنجواي
ومسيتك بسلواي
ودسيتك في دموع الالفة
نغمة فرح
وتردد انفاسك غناي
براي اقول ليك وللدنبا:
صباح الخير يازول ياسمح
مالك ساكتة
حرمتيه صوتك علي
قعدتيني علي جمر هواك وفيني تتفرجي
معقولة ما هماك حالي؟
عملت حادث ما هماك ؟
مافكرتي عن صحتي تسالي؟
ولا عن سلامتي ؟
ما لومتك!
رغم النزيف والاسى بتزكرك
وقبال الصباح بقول ليك:
صباح الخير يازول يا سمح
اتجدد وعد الشوق الكامن
في مسام نبضك احساس
اوقد جزوة حنين سكن جواك
ورفض يرحل مع غمامات
زمن الفجيعة سراب
القالوه ليك
كان سحابة صيف بتعدي عليك وعلي
يناديك همس الشوق ووجدو
شوفيها القمرة ماشة عليك
شايلة نجوم السماء قولة خير
شن فايدة العناد غير خراب
بيوت الامل العامرة بالفرح تربال
متهول انا في فجايع الزمن الكضاب
ومالي بيك ايدي
وتتشابا الاطفال لي ضحكتك
غنوة مرح وشبال
معتق بيسلواي :
صباح الخير يازول ياسمح
شايل رفاة قلبي المات حرق بي نارك
اساسق في دروب الحسرة والوجع
ماشي من غير دليل
نزيف الفؤاد سال
سقى مسامات الحلم العمار بيك
ومددني عللى فرن العشم
وما سوالي باب
متين يرن جرس الكلام منك
عشان اقيف عن مطاردة زيف الاوهام
ولا اقول ليك
اكتليني شان ارتاح
من العذاب الاسى
ما بتوسلك
ولا اقول ليك
خلاص عذبيني قدر قدرتك
وزيديني كمان وكمان
فرغي فيني غضب كل النساء
واستنفري حقدهن
وما تنسي كيدهن
عشان اكفر عن خطايا صدقي معاكم
خلاص قسميني فدية ليهن
كان ير ضيك او يرضيهن
ما بقدر اتوب من حنيني ليك
لملمت باقي الخراب الورثتيهو للفؤاد
وشلت حطام القلب
وفايت
الا اللحنين وهبتو وقف عليك للابد
يردد سيرتك
يعدد محاسنك
برسم بالوجد البتح
صورتك وبتاملك
شاهد صدري المهشم علي قسوتك
صدقيني انا ما عاتب عليك
( خلينا للايام لو لي ضميرو حسيب)
ووصيت طيور الجنة التشقشق كل صباح
نيابة عني :
صباح الخير يازول ياسمح
تفوت خطوات الكلام
تسافر معاك غنوات الفرحة
وتسكن في العيون حكاوي الوحشة
ويمر الضمير حيران
يفتش لي بشاشة قولك في الزمن الكعب
والقاك كل ما مدت العشرة
ايدها ليك
ينزل خاطرك الغالي
يزيح متاريس طريق
وعد الكتابة وصال
وفكت وثاق قسمي
اخدتني الحروف
ختتني على ابواب حنيني المبشتن
من شدة شوقي ليك
جات تازرني ورود الدنيا
و تتعطر من نكهتك
وتبلل نداها من ضحكتك
وفضلت تردد بوراي:
صباح الخير يا زول يا سمح  
                           


االحمد لله االحمد لله ااالحمد لله االحمد لله الحمد لله االحمد لله االحمد لله االحمد لله االحمد لله االحمد لله االحمد لله الذي بنعمته تتم الصالحات Arrow Arrow Arrow
avatar
شريف ابراهيم
نائب المدير العام
نائب المدير العام

عدد المساهمات : 1657
السٌّمعَة : 10
تاريخ التسجيل : 28/08/2011

الرجوع الى أعلى الصفحة اذهب الى الأسفل

رد: اجمل قصايد الصباح سودانيه

مُساهمة من طرف شريف ابراهيم في الإثنين 13 مارس 2017 - 15:01

صباح الخير يا زول يا سمح
صحى الحنين على نشيد شوق الشوق الصادح
في جروف الهوى الممتدة في مدائن فؤادك
بعد ركعتين ودعاء
هجعة وطولة بال
تتنزل السكينة على مراسيك
يغشاك المطر

فعلا كلامك سمح


االحمد لله االحمد لله ااالحمد لله االحمد لله الحمد لله االحمد لله االحمد لله االحمد لله االحمد لله االحمد لله االحمد لله الذي بنعمته تتم الصالحات Arrow Arrow Arrow
avatar
شريف ابراهيم
نائب المدير العام
نائب المدير العام

عدد المساهمات : 1657
السٌّمعَة : 10
تاريخ التسجيل : 28/08/2011

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى