ﺩﺍﻟﻴﺎ ﺍﻟﻴﺎﺱ ***** ﻧﺎﺱ ﺑﺘﺪﺧﻞ ﻓﻲ ﺣﻴﺎﺗﻚ .. ﻭﻓﺠﺄﺓ ﺗﺮﺣﻞ ﻭﺗﺨﺘﻔﻲ

ﺩﺍﻟﻴﺎ ﺍﻟﻴﺎﺱ
*****
ﻧﺎﺱ ﺑﺘﺪﺧﻞ ﻓﻲ ﺣﻴﺎﺗﻚ .. ﻭﻓﺠﺄﺓ ﺗﺮﺣﻞ ﻭﺗﺨﺘﻔﻲ
ﻭﻛﻨﺖ ﻣﻔﺘﻜﺮﻫﻢ ﺃﺣﺒﺔ .. ﻭﻓﻴﻬﻢ ﺍﻟﺨﻞ ﺍﻟﻮﻓﻲ
ﻟﻴﻬﻢ ﺃﺩﻳﺖ ﺍﻷﻣﺎﻥ .. ﻭﻛﻨﺖ ﺑﻴﻬﻢ ﻣﺤﺘﻔﻲ
ﻋﺮﻓﻮﺍ ﺳﺮﻙ ﻭﺫﻛﺮﻳﺎﺗﻚ .. ﻭﻛﻠﻮ ﻣﺎ ﻗﺪ ﻛﺎﻥ ﺧﻔﻲ
ﻭﻓﺠﺄﺓ ﺗﻜﺘﺸﻒ ﺍﻟﺤﻘﻴﻘﺔ.. ﻭﻧﺎﺭ ﺳﻌﺎﺩﺗﻚ ﺗﻨﻄﻔﻲ
ﺩﻳﻞ ﻣﺠﺮﺩ ﻧﺎﺱ ﻋﺠﻴﻴﻴﻴﺒﺔ .. ﺑﺎﻟﻮﺩﺍﺩ ﻣﺎ ﺑﺘﻜﺘﻔﻲ
ﻭﺣﻘﻮ ﺗﺘﻌﻠﻢ ﻭﺗﻔﻬﻢ .. ﻣﺎ ﺃﻱ ﺯﻭﻝ ﻛﺪﻩ ﺗﺼﻄﻔﻲ
-
****
-
ﺍﻟﺼﺪﺍﻗﺔ ﺑﻘﺖ ﻣﺼﺎﻟﺢ.. ﻭﺿﺎﻉ ﺧﻼﺹ ﻣﻌﻨﻰ ﺍﻟﻤﻮﺩﺓ
ﻣﺎﻓﻲ ﺯﻭﻝ ﻣﺨﻠﺺ ﻋﺸﺎﻧﻚ .. ﻭﻻ ﻓﻲ ﺯﻭﻝ ﺑﻘﻰ ﻋﻨﺪﻭ ﻣﺒﺪﺃ
ﻭﻛﻢ ﻋﻼﻗﺔ ﺭﻳﺪ ﻭﻋﺸﺮﺓ.. ﺍﻧﺘﻬﺖ ﻣﻦ ﻗﺒﻞ ﺗﺒﺪﺃ
ﻭﺍﻟﺘﺠﺎﺭﺏ ﻋﻠﻤﺘﻨﺎ .. ﺃﺣﺴﻦ ﺇﻧﻮ ﻧﻌﻴﺶ ﻓﻲ ﻭﺣﺪﺓ
ﻭﻧﺤﻔﻆ ﺃﺳﺮﺍﺭﻧﺎ ﻓﻲ ﻗﻠﻮﺑﻨﺎ .. ﻭﻧﻘﻀﻲ ﻳﻮﻣﻨﺎ ﺭﻛﻮﻉ ﻭﺳﺠﺪﺓ
-
***
-
ﻭﻳﺎﻣﺎ ﻧﺎﺱ ﺃﺣﺴﻨﺖ ﻟﻴﻬﺎ .. ﻭﻣﺎ ﺭﻋﺖ ﻟﻴﻚ ﺍﻟﺠﻤﻴﻞ
ﺑﺎﻋﺘﻚ ﺑﻲ ﺳﺮﻋﺔ ﺟﺪﺍً .. ﻭﻓﺘﺸﺖ ﻟﻴﻚ ﺍﻟﺒﺪﻳﻞ
ﻭﺇﻧﺖ ﺣﺎﻓﻆ ﻟﻲ ﻭﺩﺍﺩﻫﻢ .. ﻭﻃﺎﺭﻱ ﻟﻠﻌﺸﺮﺓ ﺍﻟﻘﺒﻴﻞ
ﺫﻛﺮﻳﺎﺗﻬﻢ ﻓﻴﻚ ﻋﺰﻳﺰﺓ .. ﻭﺩﻣﻌﺘﻚ ﺩﺍﻳﻤﺎً ﺗﺴﻴﻞ
ﺗﺒﻜﻲ ﻛﻞ ﺍﻟﻜﺎﻥ ﻣﻌﺎﻫﻢ .. ﻛﻞ ﻟﺤﻈﺔ.. ﻧﻬﺎﺭ ﻭﻟﻴﻞ
ﻭﻣﺮﺓ ﻣﺮﺓ ﺿﺮﻭﺭﻱ ﺗﻘﺴﻰ .. ﻣﺎ ﺗﻤﻠﻲ ﺗﻜﻮﻥ ﻧﺒﻴﻞ
-
***
-
ﺍﻟﺠﺤﻮﺩ ﻓﻲ ﺍﻟﺮﻳﺪ ﺧﻴﺎﻧﺔ .. ﻭﺍﻟﺨﻴﺎﻧﺔ ﺩﻟﻴﻠﻬﺎ ﻭﺍﺿﺢ
ﻭﺍﻟﺰﻣﻦ ﻫﺴﻊ ﺗﻐﻴﺮ .. ﻭﺍﻟﻐﺮﺍﻡ ﺃﺻﺒﺢ ﻣﺼﺎﻟﺢ
ﻭﻗﺪﺭ ﻣﺎ ﺗﺨﺪﻉ ﺣﺒﺎﻳﺒﻚ .. ﺗﺒﻘﻰ ﺇﻧﺖ ﺧﻄﻴﺮ ﻭﻓﺎﻟﺢ
ﺍﻟﻤﻬﺎﺯﻝ ﻓﻴﻨﺎ ﺗﻤﺮﺡ .. ﻭﻟﻠﻔﺴﺎﺩ ﺷﺪﻧﺎ ﺍﻟﻤﺴﺎﺭﺡ
ﺍﻟﺤﻘﻴﺮ ﺑﻘﻰ ﻓﻴﻨﺎ ﺳﻴﺪ .. ﻭﺍﻟﺤﺮﺍﻣﻲ ﻋﻈﻴﻢ ﻭﻧﺎﺟﺢ
-
****
-
ﻭﻧﺎﺱ ﺑﺘﺪﺧﻞ ﻓﻲ ﺣﻴﺎﺗﻚ .. ﻭﺗﺴﺘﻔﻴﺪ ﻣﻦ ﻛﻞ ﻟﻤﺤﺔ
ﺗﺨﺪﻋﻚ ﺑﻲ ﺫﻭﻕ ﻭﺧﻔﺔ .. ﻭﺇﺑﺘﺴﺎﻣﺔ ﻣﻌﺎﻫﺎ ﻣﺰﺣﺔ
ﻭﺇﻧﺖ ﺗﻔﺘﺢ ﻟﻴﻬﺎ ﻗﻠﺒﻚ .. ﻭﺑﻴﻬﺎ ﺗﻔﺮﺡ ﺃﺣﻠﻰ ﻓﺮﺣﺔ
ﻭﻟﻴﻬﺎ ﺑﺘﻘﺪﻡ ﺣﻴﺎﺗﻚ .. ﻭﻛﻞ ﻣﻌﺰﺍﺗﻚ ﻛﻤﻨﺤﺔ
ﻭﻣﺎ ﺣﺘﺠﻨﻲ ﺳﻮﻯ ﺍﻷﺳﻴﺔ .. ﻭﺩﻣﻌﺔ ﻣﺎﻟﺤﺔ .. ﻭﻫﻢ ﻭﺳﺮﺣﺔ
-
*****
-
ﺃﻱ ﺯﻭﻝ ﻳﺪﺧﻞ ﺣﻴﺎﺗﻚ .. ﺣﻘﻮ ﺗﻌﺮﻑ ﺳﺮ ﺩﺧﻮﻟﻮ
ﻫﻞ ﺣﻘﻴﻘﺔ ﺷﻌﻮﺭﻭ ﺻﺎﺩﻕ .. ﻭﺇﻧﺖ ﻓﻌﻼً ﻛﻨﺖ ﺯﻭﻟﻮ؟
ﻭﻫﻞ ﺣﻴﻔﻀﻞ ﺩﻳﻤﺔ ﺟﻨﺒﻚ .. ﻭﺍﻟﺴﻨﻴﻦ ﺑﻴﻜﻢ ﻳﻄﻮﻟﻮ؟
ﻭﻫﻞ ﺭﺑﻴﻊ ﺍﻟﺤﺐ ﺣﻴﺒﺪﺃ .. ﻭﺗﺰﺩﻫﺮ ﺑﺎﻟﺸﻮﻕ ﻓﺼﻮﻟﻮ؟
ﻭﻻ ﺑﺲ ﻟﺤﻈﺔ ﻭﺗﻌﺪﻱ .. ﻭﻣﺎﻓﻲ ﺣﺘﻰ ﻛﻼﻡ ﻧﻘﻮﻟﻮ
ﻭﺗﻜﺘﺸﻒ ﺇﻧﻚ ﻣﺠﺮﺩ.. ﺣﺎﺟﺔ ﺑﺘﺤﺮﻙ ﻓﻀﻮﻟﻮ !
-
***
-
ﺗﺎﻧﻲ ﻣﺮﺓ ﺿﺮﻭﺭﻱ ﺗﻬﺪﺃ .. ﺃﻭﻋﻰ ﺗﺠﺮﻱ ﻭﺭﺍﺀ ﺍﻟﺴﺮﺍﺏ
ﺃﺩﻱ ﻧﻔﺴﻚ ﻓﺮﺻﺔ ﺗﻔﻬﻢ .. ﻭﺃﺣﺴﺐ ﺍﻟﻜﻠﻤﺎﺕ ﺣﺴﺎﺏ
ﻟﺴﻪ ﻋﻨﺪﻙ ﻓﺮﺻﺔ ﺗﺎﻧﻴﺔ.. ﻭﻟﻠﻤﻮﺩﺓ ﺿﺮﻭﺭﻱ ﺑﺎﺏ
ﺑﺲ ﺗﻤﻌﻦ ﻓﻲ ﺍﻟﻤﺸﺎﻫﺪ .. ﻗﺒﻞ ﻳﻨﻘﺸﻊ ﺍﻟﻀﺒﺎﺏ
ﻭﺗﻜﺘﺸﻒ ﺯﻳﻒ ﺍﻟﺴﻌﺎﺩﺓ .. ﻭﺇﻧﻮ ﻛﺎﻧﺖ ﺑﺲ ﻋﺬﺍﺏ
ﻭﺍﻟﻨﺪﻡ ﻳﻜﺘﺐ ﺣﻜﺎﻳﺘﻚ .. ﻭﺗﺎﻧﻲ ﻧﺮﺟﻊ ﻟﻠﻌﺘﺎﺏ !!




أعجبنيعرض مزيد من التفاعلات
تعليق