نداء 1713

خيارات


‏الشاعرة إيمان ابنعوف‏



نداء 1713

خلاص منك نتقت عقابى لميتو
معاك كان بالعطش بيهاتى
ماختيتو فوق إيديك
ولا فد مره لوليتو
ولا علمتو كيف بيجيك
إذا ودّر وكِت جيتو
يكون وكت النهار راجيهو
فوق إيديهو متلفح سموم
أرض البلد مجبور
تعاين فى البلد تضحك
تشع منك بسيمة النور
تلاقى الصدقه ممحوقه
دا ماهو عشان هى كانت ناقصه
بس دخل النفاق فوقا
هو نضحك كيف ونحن بلدنا
جوّه النيل ومشروقه...؟؟
وياتو زمن نقيف نرجاهو
فى كل عام نقول بلقانا لا قِدام
ولا لاقانا زمناً زين
ولا قدمنا زاتو هو جاى
ولا لهفة سنينى معاك
بتشتل ليك أمل جواى
زمان كان الأمل مشتول
وحاة عينيك سقيتو براى
وهسى براى....!!!!!
بقلع في جذورومعاك
واحتحت منى باقى هواك
واقطر في دموعي وراك
وما همّاك...!!!
لأنك ما عرفت هواى
ولا قدّرت فيهو شقاى
شيل أسفك معاك وارحل
حرام يدخل على دنياى
مقصقص شوقى يتململ
بعد لملمت باقى أساى
تكلت هواك على بلداً
تقاسم في همومى معاى
وتتوسّد صبر باكر
مع الروح البتمرق كل يوم
تبراك تصد مفجوعة الخاطر
تناتق فى الغياب الجاك
وتتأسف على الحاضر
تنادى على بي آخر نفس بهواك
أقولك ياخى ماداير
وجع يرجاني تانى معاك
كفايه علي وجع وطناً
مكتّف دمعو جوّه حشاهو
ينزف نيل
ومن عرقو البهاتي معاهو
ينزف نيل
يقيف لا حيلو يتأمل
وكت يتقالدو النيلين
وتشرب فيهو يوماتي
ونزيف بلدك هو لا بيقيف
ولا عطشك بيروى النيل
وأفتش ليك
معا إنى الزمان ودرت فيك
لون الدروب الفيها فاتتنا
البلاد الروحت
قبلنا بارين الأتر
كل المسافات إتمحت
عاينّا بي باقى اليقين
لامن غبار عينينا فيهو إتكتحت
واقف هناك شايفك فترت من الندا
وانا أصلى حالف ما أجيك
لو ما مرق منك براك
الف وسبعميه وتلطاشر ندا..!
قدر الجروح الفيني منك
كل يوم بتجدِّدا
وانا كنت راجيك من قبيل
كانت تروح دنياى في روحك فِدا
لكني هسى وحاة عِنيك
الفي جرابى خلاص فِضا
وممكن تفوت..!!!
أصلو الفضل من عمري
ماواقف عليك..
الكان زمان واقف عليك
وقّفت بينو المستحيل
عودتو إنت على الغياب
علمتو أشكال الرحيل
وديتو يشرب في السراب
رويان هو بالصبر الجميل
قنعان وما بارى السحاب
الكان عليهو الشيل تقيل
في بلدى ماصبّت مطر
غسلت نهارات النزيف
من قمنا ما صبّت مطر
تاريخنا بيها صبح نضيف
كملت مواعين الأحاجى
الأصلى داير أحكيها ليك
حتحتّ حِس صوتى بيناجى
يقولّى ياخى حرام عليك
تاكينى وارجع بالدرب
يمكن يصادفنى وأجيك
لكنى من حر الشمس
مافينى روح اتضارى فيك
روِّح خلاص دربك طويل
أنا أصلى راجع من هنا
بغريك مع الشكر الجزيل
مليون سلام...!
وإنشاالله ما يلقاك عنا